ଡିଏମ୍ଏଫ୍ ପାଣ୍ଠି ଖଣି ପ୍ରଭାବିତ ଲୋକଙ୍କ ପାଇଁ — ସରକାରଙ୍କ ଇଚ୍ଛାଧୀନ ଖର୍ଚ୍ଚ ପାଇଁ ନୁହେଁ

*CAG ରିପୋର୍ଟରେ ଦମ୍ଫ ପାଣ୍ଠି ବ୍ୟବହାରକୁ ନେଇ ଗୁରୁତର ଚିତ୍ର*

ଭୁବନେଶ୍ୱର ( ଦେବାଶିଷ ଦାଶ ‌)

CAG ରେ ସରକାରଙ୍କ ଖର୍ଚ୍ଚର ବିସ୍ଫୋରକ ତଥ୍ୟ ସାମ୍ନାକୁ ଆସିଛି ଏବଂ ଏହାକୁ ନେଇ କଂଗ୍ରେସ ଭବନଠାରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା l

ଏହି ସାମ୍ବାଦିକ ସମ୍ମିଳନୀକୁ ସଂଚାଳନ କରି ଗଣମାଧ୍ୟମ ବିଭାଗ ଅଧ୍ୟକ୍ଷ ସାମ୍ବାଦିକଙ୍କୁ କହିଛନ୍ତି ଯେ, ଏମଏମଡିଆର ମାଧ୍ୟମରେ ସରକାର ରାଜ୍ୟର ସ୍ୱାୟତ୍ତତାକୁ ଜଳାଞ୍ଜଳି ଦେଇଛନ୍ତି l ଅପରପକ୍ଷେ କଂଗ୍ରେସ ବାରମ୍ବାର ଏହାର ବିରୋଧ ଆନ୍ଦୋଳନ, ଧାରଣା, ପ୍ରତିବାଦ ସହ କଲେ ମଧ୍ୟ ସରକାର କର୍ଣ୍ଣପାତ କରୁନାହିଁ l ଆଜି CAG ରିପୋର୍ଟରେ ଖଣି ଲୁଟର ପର୍ଦାଫାଶ ହୋଇଛି l

CAG ରିପୋର୍ଟ ଉପରେ ନିଜର ବକ୍ତବ୍ୟ ଉପସ୍ଥାପନ କରି ବରିଷ୍ଠ କଂଗ୍ରେସ ନେତା ସୁଦର୍ଶନ ଦାସ କହିଲେ ଯେ,

ଓଡ଼ିଶାରେ ୨୦୧୫-୧୬ ମସିହାରୁ ଆଜି ପର୍ଯ୍ୟନ୍ତ ଜିଲ୍ଲା ଖଣିଜ ପ୍ରତିଷ୍ଠାନ ବା District Mineral Foundation (DMF) ମାଧ୍ୟମରେ ୨୬,୬୦୨ କୋଟି ଟଙ୍କାରୁ ଅଧିକ ଅର୍ଥ ଆସିଛି। ଏହି ଅର୍ଥ ଖଣି ଦ୍ୱାରା ପ୍ରଭାବିତ ଲୋକ ଓ ଅଞ୍ଚଳର ବିକାଶ ଏବଂ ଖଣିଜ କାର୍ଯ୍ୟକଳାପ ଯୋଗୁଁ ହେଉଥିବା କ୍ଷତିର ଭରଣା ପାଇଁ ଉଦ୍ଦିଷ୍ଟ।

କିନ୍ତୁ ନିକଟରେ ପ୍ରକାଶିତ CAG ର Performance Audit Report ଏହି ପାଣ୍ଠିର ବ୍ୟବହାରକୁ ନେଇ ଅତ୍ୟନ୍ତ ଗୁରୁତର ଚିତ୍ର ସାମ୍ନାକୁ ଆଣିଛି।

ଏହା କେବଳ କିଛି ଆର୍ଥିକ ଅନିୟମିତତାର ପ୍ରଶ୍ନ ନୁହେଁ। ଏହା ହେଉଛି ଯେଉଁ ଲୋକମାନେ ଖଣି ପାଇଁ ନିଜର ଜମି, ଜଙ୍ଗଲ, ଜଳ ଓ ଜୀବିକା ହରାଇଛନ୍ତି, ସେମାନଙ୍କ ପ୍ରତି ନ୍ୟାୟର ପ୍ରଶ୍ନ।

ମୁଁ CAG ରିପୋର୍ଟରୁ ୧୦ଟି ଗୁରୁତର ତଥ୍ୟ ଲୋକଙ୍କ ସାମ୍ନାରେ ରଖିବାକୁ ଚାହୁଁଛି। ୧. ୨୬,୬୦୨ କୋଟି ଟଙ୍କା ଆସିଲା, କିନ୍ତୁ ଖର୍ଚ୍ଚ ହେଲା ମାତ୍ର ୫୯ ପ୍ରତିଶତ

୨୦୧୫-୧୬ରୁ ୨୦୨୩-୨୪ ମଧ୍ୟରେ ଓଡ଼ିଶାର ୩୦ଟି DMF ୨୬,୬୦୨.୬୬ କୋଟି ଟଙ୍କା ପାଇଛି।

ଏଥିରୁ ୨୫,୯୬୯.୮୭ କୋଟି ଟଙ୍କାର ପ୍ରକଳ୍ପ ଅନୁମୋଦନ ହୋଇଥିଲା। କିନ୍ତୁ ମାର୍ଚ୍ଚ ୨୦୨୪ ସୁଦ୍ଧା ପ୍ରକୃତରେ ଖର୍ଚ୍ଚ ହୋଇଛି ମାତ୍ର ୧୫,୮୧୭.୫୬ କୋଟି — ଅର୍ଥାତ୍ ୫୯.୪୬ ପ୍ରତିଶତ।

ଏତେ ବିପୁଳ ଅର୍ଥ ଥାଇ ମଧ୍ୟ ଖଣି ପ୍ରଭାବିତ ଅଞ୍ଚଳରେ ପାନୀୟ ଜଳ, ସ୍ୱାସ୍ଥ୍ୟ, ଶିକ୍ଷା, ଜୀବିକା ଓ ପରିବେଶ ପୁନରୁଦ୍ଧାର ଭଳି ମୌଳିକ ସମସ୍ୟା କାହିଁକି ରହିଛି? ୨. ଖଣି ପ୍ରଭାବିତ ନଥିବା ଗାଁରେ ଖର୍ଚ୍ଚ ହେଲା ୯୮୩ କୋଟି ଟଙ୍କା

ଏହା CAG ରିପୋର୍ଟର ସବୁଠାରୁ ଚିନ୍ତାଜନକ ତଥ୍ୟ ମଧ୍ୟରୁ ଗୋଟିଏ।

କେନ୍ଦୁଝର ଓ ସୁନ୍ଦରଗଡ଼ ଜିଲ୍ଲାରେ ୯୭୬ଟି ଖଣି ପ୍ରଭାବିତ ନଥିବା ଗାଁରେ ୨,୨୨୪ଟି ପ୍ରକଳ୍ପ ପାଇଁ ୯୮୩.୩୨ କୋଟି ଟଙ୍କା ଖର୍ଚ୍ଚ ହୋଇଛି।

ଅନ୍ୟପକ୍ଷରେ ୪୮୮ଟି ପ୍ରତ୍ୟକ୍ଷ ଖଣି ପ୍ରଭାବିତ ଗାଁ ଏବଂ ୯୬ଟି ପରୋକ୍ଷ ଖଣି ପ୍ରଭାବିତ ଗାଁରେ ଗୋଟିଏ ବି DMF ପ୍ରକଳ୍ପ ହୋଇନାହିଁ।

ଅର୍ଥାତ୍, ଯେଉଁମାନେ ଖଣିର ମୂଲ୍ୟ ଦେଲେ, ସେମାନେ ବଞ୍ଚିତ ହେଲେ; ଆଉ ଯେଉଁମାନେ ଖଣି ପ୍ରଭାବିତ ନୁହନ୍ତି, ସେମାନଙ୍କ ଅଞ୍ଚଳରେ DMF ଟଙ୍କା ଖର୍ଚ୍ଚ ହେଲା।୩. ଗ୍ରାମସଭାକୁ ଅଣଦେଖା

CAG ତିନୋଟି ପ୍ରତ୍ୟକ୍ଷ ଖଣି ପ୍ରଭାବିତ ଗାଁକୁ ଯାଞ୍ଚ କରି ଦେଖିଛି ଯେ ଗ୍ରାମସଭା ୪୯ଟି ପ୍ରକଳ୍ପ ପ୍ରସ୍ତାବ ଦେଇଥିଲା।

କିନ୍ତୁ ଗୋଟିଏ ବି ପ୍ରକଳ୍ପ କାର୍ଯ୍ୟକାରୀ ହୋଇନାହିଁ।

ଏହି ପ୍ରସ୍ତାବଗୁଡ଼ିକ କାହିଁକି ଗ୍ରହଣ କରାଗଲା ନାହିଁ, ତାହାର କୌଣସି ରେକର୍ଡ ମଧ୍ୟ ନାହିଁ।

ତେବେ ପ୍ରଶ୍ନ ହେଉଛି — DMF ଯଦି ଖଣି ପ୍ରଭାବିତ ଲୋକଙ୍କ ପାଇଁ, ତେବେ ସେମାନଙ୍କ ଗ୍ରାମସଭାର ମତାମତର ମୂଲ୍ୟ କଣ? ୪. ରାଉରକେଲା ହକି ଷ୍ଟାଡିୟମ ପାଇଁ ୧୩୬.୭୭ କୋଟି l ସୁନ୍ଦରଗଡ଼ DMFରୁ ରାଉରକେଲା ଅନ୍ତର୍ଜାତୀୟ ହକି ଷ୍ଟାଡିୟମ ପାଇଁ ୧୩୬.୭୭ କୋଟି ଟଙ୍କା ଖର୍ଚ୍ଚ କରାଯାଇଛି।

CAG ଏହି ଖର୍ଚ୍ଚକୁ ଅନିୟମିତ ବୋଲି ଦର୍ଶାଇଛି, କାରଣ ଏହା PMKKKY ଅଧୀନରେ ଅନୁମୋଦିତ କାର୍ଯ୍ୟ ମଧ୍ୟରେ ଆସୁନାହିଁ।

ହକି ବିରୋଧରେ ଆମର କୌଣସି ପ୍ରଶ୍ନ ନାହିଁ। ସୁନ୍ଦରଗଡ଼ର ହକି ପରମ୍ପରାକୁ ନେଇ ଓଡ଼ିଶା ଗର୍ବିତ।

କିନ୍ତୁ ପ୍ରଶ୍ନ ହେଉଛି —

ଖଣି ପ୍ରଭାବିତ ଲୋକଙ୍କ ପାଇଁ ଉଦ୍ଦିଷ୍ଟ ଟଙ୍କା ଏକ ଷ୍ଟାଡିୟମ ପାଇଁ କାହିଁକି ଖର୍ଚ୍ଚ ହେବ? ୫. PMKKKY ନିୟମ ବାହାରେ ୬୭୯ କୋଟି ଟଙ୍କାର ପ୍ରକଳ୍ପ

CAG ପାଞ୍ଚଟି ଜିଲ୍ଲାର ଯାଞ୍ଚ କରି ୬୭୯.୧୪ କୋଟି ଟଙ୍କାର ୩୧୭ଟି ପ୍ରକଳ୍ପ ଚିହ୍ନଟ କରିଛି, ଯାହା PMKKKY ନିୟମ ବାହାରେ ଅନୁମୋଦନ କରାଯାଇଥିଲା।

ଏଥିରେ ରହିଛି —

ପାଣିକୋଇଲିରେ Science Academy ପାଇଁ ୧୧୩.୬୫ କୋଟି; କେନ୍ଦୁଝରରେ Truck Parking ପାଇଁ ୬୩.୯୫ କୋଟି; ୧୧୩ଟି ଗାଁରେ ଖେଳ ପଡିଆ ପାଇଁ ୫୩.୬୬ କୋଟି;

ଖଣି ପ୍ରଭାବିତ ନଥିବା ଅଞ୍ଚଳରେ District Headquarters Hospital ପାଇଁ ୪୩.୪୩ କୋଟି ଟଙ୍କା।

ତେବେ ପ୍ରଶ୍ନ ହେଉଛି — DMF କ’ଣ ଏବେ ଜିଲ୍ଲା ପ୍ରଶାସନର ଆଉ ଏକ ସାଧାରଣ ପାଣ୍ଠିରେ ପରିଣତ ହୋଇଗଲାଣି? ୬. ସରକାରଙ୍କ ନିଜ ଦାୟିତ୍ୱ ପାଇଁ DMF ଟଙ୍କା

ଜାଜପୁର, କେନ୍ଦୁଝର ଓ ସୁନ୍ଦରଗଡ଼ DMFରୁ ୧୭୧.୭୯ କୋଟି ଟଙ୍କା ଅତିରିକ୍ତ MGNREGS ମଜୁରି ଦେବା ପାଇଁ ଖର୍ଚ୍ଚ ହୋଇଛି।

CAG କହିଛି, ଏହି ଅର୍ଥ ରାଜ୍ୟ ସରକାରଙ୍କ ନିଜସ୍ୱ ପାଣ୍ଠିରୁ ଦିଆଯିବା କଥା ଏବଂ ଏହା PMKKKY ଅଧୀନରେ ଅନୁମୋଦିତ ଖର୍ଚ୍ଚ ନୁହେଁ।

DMF କ’ଣ ଏବେ ରାଜ୍ୟ ସରକାରଙ୍କ ବଜେଟ୍ ଅଭାବ ପୂରଣର ବିକଳ୍ପ ପାଣ୍ଠି? ୭. ପୋଲିସ ଗାଡ଼ି, ଅଫିସ ଓ କଲେକ୍ଟରଙ୍କ ବାସଭବନ ପାଇଁ DMF ଟଙ୍କା

ସୁନ୍ଦରଗଡ଼ରେ ୨୫.୦୧ କୋଟି ଟଙ୍କାର ପ୍ରଶାସନିକ ଖର୍ଚ୍ଚକୁ CAG ଅନିୟମିତ ବୋଲି ଦର୍ଶାଇଛି। ଏଥିରେ ପୋଲିସ ପାଟ୍ରୋଲିଂ ଗାଡ଼ି, ପୌରସଂସ୍ଥା କାର୍ଯ୍ୟାଳୟ ମରାମତି, କଲେକ୍ଟରଙ୍କ ବାସଭବନରେ Reading Room ମରାମତି, ଉଦ୍ଘାଟନ ଖର୍ଚ୍ଚ ଏବଂ ସ୍କୁଲ୍ କାର୍ଯ୍ୟକ୍ରମ ଭଳି ଖର୍ଚ୍ଚ ରହିଛି।

ଖଣି ପ୍ରଭାବିତ ଲୋକଙ୍କ ଟଙ୍କା କ’ଣ ଜିଲ୍ଲା ପ୍ରଶାସନର ଇଚ୍ଛାଧୀନ ପାଣ୍ଠି? ୮. ୪୭୦ କୋଟିରୁ ଅଧିକ ଟଙ୍କା ଏବେ ବି Implementing Agencies ପାଖରେ

ଜାଜପୁର, କେନ୍ଦୁଝର ଓ ସୁନ୍ଦରଗଡ଼ର Implementing Agencies ପାଖରେ ପ୍ରକଳ୍ପ ସମାପ୍ତ ହେବା ପରେ ମଧ୍ୟ ୪୭୦.୨୫ କୋଟି ଟଙ୍କାର ଅବ୍ୟବହୃତ ଅର୍ଥ ଫେରସ୍ତ ହୋଇନାହିଁ।

ଏହା ସହିତ ୨୬.୫୧ କୋଟି ଟଙ୍କାର ସୁଧ ମଧ୍ୟ ଫେରସ୍ତ ହୋଇନାହିଁ।

ଏତେ ବଡ଼ ପରିମାଣର ସାର୍ବଜନୀନ ଅର୍ଥ ପ୍ରକଳ୍ପ ସରିବା ପରେ ମଧ୍ୟ କାହିଁକି Implementing Agencies ପାଖରେ ରହିବ?୯. ଦୁର୍ବଳ ଆର୍ଥିକ ପରିଚାଳନା ଯୋଗୁଁ ପ୍ରାୟ ୯୪ କୋଟି ଟଙ୍କାର ସୁଧ କ୍ଷତି

ମୟୂରଭଞ୍ଜ, ଢେଙ୍କାନାଳ ଓ ନବରଙ୍ଗପୁରରେ surplus DMF ଅର୍ଥକୁ ଠିକ୍ ଭାବେ ନିବେଶ ନକରିବା ଯୋଗୁଁ ୯.୪୯ କୋଟି ଟଙ୍କାର ସୁଧ କ୍ଷତି ହୋଇଥିବା CAG ଦର୍ଶାଇଛି।

କେନ୍ଦୁଝରରେ ଆଉ ୮୪.୫୧ କୋଟି ଟଙ୍କାର ସୁଧ କ୍ଷତି ହୋଇଛି।

ଅର୍ଥାତ୍ ପ୍ରାୟ ୯୪ କୋଟି ଟଙ୍କାର ସମ୍ଭାବ୍ୟ ଆୟ କେବଳ ଦୁର୍ବଳ ଆର୍ଥିକ ପରିଚାଳନା ଯୋଗୁଁ ହରାଇଛି। ୧୦. ହଜାର ହଜାର କୋଟି ଖର୍ଚ୍ଚ ହେଲା, କିନ୍ତୁ ଦୀର୍ଘମିଆଦୀ ଯୋଜନା ନାହିଁ

CAG ଯାଞ୍ଚ କରିଥିବା ଛଅଟି DMF ମଧ୍ୟରୁ କୌଣସି ଗୋଟିଏ ମଧ୍ୟ ଆବଶ୍ୟକ Perspective Plan କିମ୍ବା Master Plan ପ୍ରସ୍ତୁତ କରିନଥିଲା।

ଏହି ଛଅଟି DMF ୨୨,୫୬୮ କୋଟି ଟଙ୍କାରୁ ଅଧିକ ଅର୍ଥ ପାଇଥିବାବେଳେ ୧୭,୪୩୫ଟି ପ୍ରକଳ୍ପ ପାଇଁ ୨୦,୯୪୭ କୋଟି ଟଙ୍କା ଅନୁମୋଦନ କରାଯାଇଥିଲା।

ହଜାର ହଜାର କୋଟି ଟଙ୍କା ଖର୍ଚ୍ଚ ହେଉଛି, କିନ୍ତୁ ଖଣି ପ୍ରଭାବିତ ଅଞ୍ଚଳର ପରିବେଶ ପୁନରୁଦ୍ଧାର, ଜୀବିକା ସୁରକ୍ଷା, ସ୍ୱାସ୍ଥ୍ୟ ଓ ଭବିଷ୍ୟତ ପାଇଁ ଦୀର୍ଘମିଆଦୀ ଯୋଜନା କେଉଁଠି?

CAG ରିପୋର୍ଟ ଯେଉଁ ଚିତ୍ର ସାମ୍ନାକୁ ଆଣିଛି, ତାହା କେବଳ କିଛି ବିଚ୍ଛିନ୍ନ ଆର୍ଥିକ ଅନିୟମିତତାର ଘଟଣା ନୁହେଁ।

ଏହା DMF ପାଣ୍ଠିର ଯୋଜନା, ଅନୁମୋଦନ, ବ୍ୟବହାର, ନିରୀକ୍ଷଣ ଏବଂ ଉତ୍ତରଦାୟିତ୍ୱ ବ୍ୟବସ୍ଥାରେ ଏକ ବ୍ୟବସ୍ଥିତ ବିଫଳତାର ଚିତ୍ର।

ଖଣି ପାଇଁ କେନ୍ଦୁଝର, ସୁନ୍ଦରଗଡ଼, ଜାଜପୁର, ମୟୂରଭଞ୍ଜ ଓ ଅନ୍ୟାନ୍ୟ ଜିଲ୍ଲାର ଲୋକେ ନିଜର ଜମି, ଜଙ୍ଗଲ, ଜଳ ଓ ଜୀବିକା ହରାଇଛନ୍ତି।

DMF ଗଠନ କରାଯାଇଥିଲା ଏହି ଲୋକମାନଙ୍କୁ ଖଣିଜ ସମ୍ପଦର ଲାଭର ଏକ ଅଂଶ ଦେବା ଏବଂ ଖଣି ଯୋଗୁଁ ସେମାନଙ୍କ ଉପରେ ପଡ଼ିଥିବା କ୍ଷତିର ଭରଣା କରିବା ପାଇଁ।

DMFକୁ ସରକାରଙ୍କ ଆଉ ଏକ ସାଧାରଣ ପାଣ୍ଠିରେ ପରିଣତ କରିବାକୁ ଦିଆଯାଇପାରିବ ନାହିଁ।

ତେଣୁ କଂଗ୍ରେସର ଦାବି —

ପ୍ରଥମ: ୨୦୧୫-୧୬ରୁ ଏପର୍ଯ୍ୟନ୍ତ ପ୍ରତ୍ୟେକ ଜିଲ୍ଲାରେ DMFକୁ କେତେ ଅର୍ଥ ଆସିଛି, କେତେ ଅନୁମୋଦନ ହୋଇଛି, କେତେ ଖର୍ଚ୍ଚ ହୋଇଛି ଏବଂ କେତେ ଅବ୍ୟବହୃତ ଅଛି — ଏହାର ଏକ ଶ୍ୱେତପତ୍ର ପ୍ରକାଶ କରାଯାଉ।

ଦ୍ୱିତୀୟ: CAG ଚିହ୍ନଟ କରିଥିବା ଅନିୟମିତ ଓ ଅନୁମୋଦନଯୋଗ୍ୟ ନଥିବା ସମସ୍ତ ଖର୍ଚ୍ଚର ଅର୍ଥ ତୁରନ୍ତ ଫେରସ୍ତ କରାଯାଉ।

ତୃତୀୟ: ଏହି ଅନିୟମିତତା ପାଇଁ ଦାୟୀ ଅଧିକାରୀ ଓ କର୍ତ୍ତୃପକ୍ଷଙ୍କ ଦାୟିତ୍ୱ ନିର୍ଦ୍ଧାରଣ କରାଯାଉ।

ଚତୁର୍ଥ: କେଉଁ ଖଣି ପ୍ରଭାବିତ ଗାଁକୁ କେତେ DMF ଟଙ୍କା ମିଳିଛି, ତାହାର ଗାଁୱାରୀ ତଥ୍ୟ ସାର୍ବଜନୀନ କରାଯାଉ।

ପଞ୍ଚମ: ପ୍ରତ୍ୟେକ DMF ପ୍ରକଳ୍ପର ଖର୍ଚ୍ଚ, ଲାଭାନ୍ୱିତ, କାର୍ଯ୍ୟକାରୀ ସଂସ୍ଥା, ଆରମ୍ଭ ଓ ସମାପ୍ତି ତାରିଖ ସହ ସମସ୍ତ ତଥ୍ୟ ଅନଲାଇନରେ ପ୍ରକାଶ କରାଯାଉ।

ଷଷ୍ଠ: ପ୍ରତ୍ୟକ୍ଷ ଖଣି ପ୍ରଭାବିତ ଗାଁ ଓ ଗ୍ରାମସଭାର ପ୍ରାଥମିକତାକୁ DMF ଖର୍ଚ୍ଚରେ ସର୍ବୋଚ୍ଚ ସ୍ଥାନ ଦିଆଯାଉ।

ସପ୍ତମ: ପ୍ରତ୍ୟେକ DMF ପାଇଁ ଆବଶ୍ୟକ Perspective Plan ଓ Master Plan ପ୍ରସ୍ତୁତ କରାଯାଉ।

ଅଷ୍ଟମ: PMKKKY ନିୟମ ବାହାରେ ହୋଇଥିବା ସମସ୍ତ ବଡ଼ ପ୍ରକଳ୍ପର ସ୍ୱାଧୀନ ସମୀକ୍ଷା କରାଯାଉ।

ଓଡ଼ିଶାର ଖଣିଜ ସମ୍ପଦ ରାଜ୍ୟକୁ ସମୃଦ୍ଧ କରିଛି। କିନ୍ତୁ ସେହି ସମ୍ପଦ ପାଇଁ ଯେଉଁ ଲୋକମାନେ ନିଜ ଜମି, ଜଙ୍ଗଲ, ଜଳ ଓ ଜୀବିକା ହରାଇଛନ୍ତି, ସେମାନେ ଯଦି ଏହାର ଲାଭରୁ ବଞ୍ଚିତ ହୁଅନ୍ତି, ତେବେ ଏହା କେବଳ ପ୍ରଶାସନିକ ବିଫଳତା ନୁହେଁ — ଏହା ସେମାନଙ୍କ ପ୍ରତି ଅନ୍ୟାୟ।ସମ୍ମିଳନୀରେ ଉପସ୍ଥିତ କଂଗ୍ରେସ ନେତା ସୁଧାଂଶୁ ଦେଓ କହିଲେ DMF ସରକାରଙ୍କ ଟଙ୍କା ନୁହେଁ। ଏହା ହେଉଛି ଖଣି ପ୍ରଭାବିତ ଲୋକଙ୍କ ଅଧିକାରର ଟଙ୍କା।

ଏହାର ପ୍ରତ୍ୟେକ ଟଙ୍କାର ହିସାବ ଦେବାକୁ ପଡ଼ିବ l